احيان ياخذني مع الهم هوجاس

احيان ياخذني مع الهم هوجاس***اسج وانسى ربعي الحاضريني

صاحي وانا غايب ولا تدري الناس**اغيب واذكر ماضيات السنيني

عفت المكان اللي به الناس جلاس**واقفيت ادوّر ساحة تحتويني

لعلي اظهر ضيقةٍ بي بالانفاس**او عل يبرد حرتي دمع عيني

طرى عليه من قتل في الاحساس**اللي قسمت القلب بينه وبيني

ياوجد حالي وجد من خمه نعاس**رقد وربعه قد مضو راحليني

راحو وجوه اعداه بسيوف واقواس**خذوه اسير ولا لقا له معيني

عشرين عام فوقه القوم حراس**يالين فر من القيود السجيني

روح يبى ربعه بعد قطع الارماس**يم الشمال يضنهم نازليني

لكنهم ماتو بعد جوع وعماس**والموت ياقربه لحبل الوتيني

وياوجد حالي وجد من حده الياس**لارخاي راسٍ للصعايب متيني

دنياه ما تضحك ولا تافر الباس**الصدر قبر وميته له ونيني

ياصاحبي ماعاد للهم مقياس**من كثر منته بالهوى مستهيني

انته وانا والشوق مع صبح الانفاس** نورٍ يفك قيود ليل وسجيني